ក្រសួងទេសចរណ៍ ណែនាំដល់ម្ចាស់ ឬអ្នកគ្រប់គ្រងហាងខារ៉ាអូខេ ក្លឹបកម្សាន្ត បារ និងបៀរហ្គាឌិន នៅទូទាំងប្រទេស ផ្អាកអាជីវកម្មមួយថ្ងៃ គឺនៅថ្ងៃ ទី8 ខែធ្នូ ដើម្បីចូលរួមកាន់ទុក្ខជាតិ ចំពោះការសោយទិវង្គតរបស់សម្ដេចក្រុមព្រះ នរោត្តម រណឫទ្ធិ។
ក្រសួងបានណែនាំដល់ប្រធានមន្ទីរទេសចរណ៍រាជធានី-ខេត្ត ផ្សព្វផ្សាយ និងអប់រំដល់ម្ចាស់ ឬអ្នកគ្រប់គ្រង អាជីវកម្ម សេវាកម្មទេសចរណ៍ខាងលើ ដើម្បីអនុវត្តការផ្អាកអាជីវកម្មស្របតាមសារាចរណែនាំនេះប្រកបដោយប្រសិទ្ធភាព និងការទទួលខុសត្រូវ។
ព្រះអង្្គទ្រង់ បានសោយទិវង្គតក្នុងព្រះជន្ម 77 ព្រះវស្សា នៅប្រទេសបារាំង នៅព្រឹកថ្ងៃទី28 ខែវិច្ឆិកា។
ព្រះអង្គប្រសូតនៅថ្ងៃទី2 ខែមករា ឆ្នាំ1944 ជាព្រះរាជបុត្រទីពីររបស់សម្ដេចព្រះ នរោត្តម សីហនុ និងភរិយារបស់ព្រះអង្គ គឺព្រះនាម ផាត់ កុល។ លោកជានាយករដ្ឋមន្ត្រីទី1 ពីឆ្នាំ1993 ដល់ឆ្នាំ1997 និងជាប្រធានរដ្ឋសភាពីឆ្នាំ1998 ដល់ឆ្នាំ2006។
រាជរដ្ឋាភិបាលកម្ពុជា បានកំណត់យកថ្ងៃទី 8 ខែធ្នូ ជាថ្ងៃកាន់ទុក្ខជាតិ ដោយតម្រូវឱ្យគ្រប់ក្រសួង ស្ថាប័ន សាលារៀន មន្ទីរពេទ្យ រដ្ឋ ឯកជន និងមន្ត្រីរាជការទាំងអស់នៃកងកម្លាំងប្រដាប់អាវុធ វត្តអារាម ក៏ដូចជាប្រជាពលរដ្ឋទូទាំងប្រទេស ដោយមានការដាក់ទង់ជាតិនៅពាក់កណ្តាលបង្គោល ជាមួយគ្នានេះ គ្រប់ស្ថានីយ៍វិទ្យុ និងទូរទស្សន៍ជាតិ និងឯកជនទាំងអស់ ត្រូវផ្អាកការសម្តែងរបស់ខ្លួន និងចាក់ផ្សាយនូវទិដ្ឋភាពប្លែកៗ ដើម្បីគោរពវិញ្ញាណក្ខន្ធ។